CHLAUS-EVENT 2021
Eine Einladung vom Samichlaus! Unsere Ponys hatten genau dies bekommen. Weil sie sich aber alleine nicht trauten, haben unzählige Ponyclub-Kinder am 5. Dezember gemeinsam einen Spaziergang gemacht und dann unseren vierbeinigen Freunden im Kolbenhof die Hufe gehalten, als es hiess: Achtung, Pony, bitte vortreten.
Ganz schön blöd hatten unsere Kolbenhof Ponys vor einigen Wochen aus der Wäsche geschaut, als ein Brief für sie in den Stall flatterte. Eine Einladung von Samichlaus. Seine Vögelchen hätten das ganze Jahr eifrig einen Blick auf die Ponys geworfen und dem Samichlaus berichtet, was alles so passiert war. Nun wollte er der Herde gerne erzählen, was sie besonders gut gemacht hatten und was vielleicht auch noch verbesserungswürdig war. Doch – oh Schreck – die Angst hatte sie gepackt. Sie brauchten also für den Samichlausbesuch ganz dringend Unterstützung.
Sehr froh waren sie deswegen als am 5. Dezember über 40 Kinder und ihre Eltern sich um 14:00 Uhr im Kolbenhof einfanden, um die zehn Ponys zu begleiten. Gemeinsam ging es auf eine Runde durch den Uetliberg-Wald. Doch wo war er bloss, der Samichlaus? Immer wieder riefen die Kinder nach ihm. Und dann, endlich, hörten wir sein Glöckchen bimmeln. Kaum waren wir um die Kurve gekommen und hatten freie Sicht auf den unteren Weg, konnten wir den Mann im roten Gewand erblicken. Mit seinem Sack über der Schulter war er im strammen Marsch auf dem Weg Richtung Kolbenhof. Nichts wie hinterher also.
Angekommen zuhause versammelten wir uns in der Überdachung. Die Ponys in Reih und Glied, die Kinder gespannt… Und da auch der Samichlaus, der um die Ecke kam. So manchem Pony war es nicht ganz geheuer. Doch gemeinsam mit der Hilfe der vielen Kinder schafften sie es alle, vor den Samichlaus zu treten und ihr Lob (und ihren Tadel) für die letzten Monate abzuholen. Aber lest selbst:
Asterix
Du bisch also de chliini Asterix. Vo Dier hend mir mini Vögeli aber nüt Guets brichtet. Du segsch ganz en Arme, hend sie xeit. Buuchweh plagt Dich immer wieder? Chas denn sii, dass Du allefalls chli z’giirig bisch bim fresse? De Samichlaus het en guete Tipp für Dich: Mängisch isch weniger me!
Mier isch aber au zu Ohre cho, dass Du ganz en Liebe bisch mit de chliine Chind. Du segsch immer ganz geduldig und nie zabblig. Du tuesch Dier zum Bispiil immer ganz brav d’Huuf uschratze la. Das xet de Samichlaus gern. Wiiter so, liebe Asterix. De Samichlaus het dier da es Rübeli mitgno.
Obelix
Nachem Asterix also de Obelix. Ich xen scho, wieso dass Du dä Name treisch. Hesch meinti bitz de grösser Buuch wie Din Kolleg, hä? Du segemal Obelix. Wieso hesch denn Du sonen Muulchorb a?
Wötsch nöd verzelle? De Samichlaus weiss das scho. Vor mier chamer kei Gheimnis ha. Biisse tuesch Du also. Das xen ich aber gar nöd gern. Au wenn mier mini Vögelil au zwitscherd hend, dass Du das offebar nöd machsch, will Du bös bisch, sondern will Du Ufmerksamkeit willsch. Obelix, ich muen Dier eis sege: Das isch de falschi Wäg. Will ich aber de gueti Wille scho xe, chunsch au Du es Rüebli über.
Cleo
Ja luegemal da ane. Cleo. Isch das öbe d’Abchürzig vo Kleopatra? Du weisch, dass das ganz e edli Königin xi isch? Mini Vögeli hend mier aber xeit, dass Du mängisch nöd ganz eso elegant underwegs bisch. Du tägsch Dich gern im Schlamm wälze und uf de Weid umejage? Wenn ich ehrlich bin, xesch Du aber nöd denaa us, als würsch Du Dich wahnsinnig vill bewege.
Was mier hingege zu Ohre cho isch, isch dass Du im Ponyclub ganz e bravi bisch. Und dass mer uf Dier am allerbeste chan galoppiere. Denn wird das mit dere Weid und dere Bewegig wohl glich richtig sii. Es Rüebli gits dadefür allemal.
Marie
So, so, d’Marie. So xet sie also us, s’Lieblingspony vo allne Ponyclub-Meitli. De Samichlaus verstaht guet, wieso all ganz verliebt sind i Dich. Du bisch geduldig und brav, machsch bi jedem Schabernack mit und bisch voll debii. Das find ich super.
Und was mier bsunders guet gfallt isch, dass Du ja jetzt sogar es Riitschuelpony worde bisch. Ide Riitstunde chamer Dich also au iisetze? Das isch toll, Marie. Ganz stolz isch de Samichlaus uf Dich. Was mer no bitzli müend üebe, hani ghört, isch das mitem galoppiere. Aber allefalls wird das ja chli besser, wenns etz es Rüebli vom Samichlaus git.
Flicka
Die jüngst im Bund segsch Du, liebi Flicka? Öpe au die frächst? Mini Vögeli säged, das seg scho bitzli so. Du tägsch Dich amel gar bitz hinder de andere verstecke und so tue, als chöntsch Du keis Wässerli trübe und de anderne d’Schuld id Schueh schiebe? Das ghört sich so aber nöd, gell?
De Samichlaus weiss aber au, dass mer als Pony bitzli fräch muen sii. Ghört schliesslich dezue. Und im Ponyclub machsch es immer ganz brav. Uf de Hardwiese hegsch dä Summer au en grandiose Job erledigt und hegsch villi Chind dur d’Füehzügelklass bracht. Das findich natürlich super. Was hetisch gern, liebi Flicka: Öpfel oder Rüebli?
Rosalie
Sind die Blueme öpe für dii?
En chline Scherz vom Samichlaus – musch entschuldige. Ich weiss, ha scho besseri gmacht. Aso zrugg zu Dier. Wege dem simmer hüt ja da, oder? Du dunksch mich chli gar chlii. Ich xen dich ja fast nöd. Chum mal chli nächer. Ja, no bitzeli bitte.
Sodeli etz xet Dich de Samichlaus guet, danke liebi Rosalie. Ich han ghöre sege, dass Du es rechts Flohnerlebe hegsch. Stimmt das öppe? Du wirsch ganz vill bespasst vones paar Meitli. Bisch Du denn au immer ganz brav mit ihne? Ja? Sicher? Aso guet. Da nimm es Rüebli, aber nöd es z’grosses, gell.
Hermes
Nei, Rosalie, Du hesch scho gha. Uf mim Zettel staht jetzt Hermes.
Was? Was, segeder Chinde? Das isch nöd d’Rosalie? Aso losed mal zue, es isch scho wahr, de Samichlaus isch fäng chli en alte Maa, aber dumm bini wäge dem also nonig. Ich weiss doch, dass genau das Pony vor 30 Sekunde scho da gstande isch.
Die xend gliich uus? Jä soo. Ok. Aso demfall zu Dier Hermes. E ganz e noii Ufgab hegsch Du gfasst das Jahr, han ich erfahre. E noii Liebi gfunde? Jaja, das het de Samichlaus ghört. Mia söll sie heisse. Passisch guet uf sie uf, gell? Da, nimm es Rüebli.
Klein Ida
Mit de Ida hetich es Hüehnli z’rupfe, aber ich han ghört, dass sie chrank isch. Das tuet mier natürli ganz fest leid. Offebar isch aber öpert da, wo ihre nachane wür go verzelle, was ich ihre zsege han. Lotta Bini heisst sie. Isch sie da?
Aso liebi Lotta, es isch so, de Ida ihri Streich passed gar nöd all i mis Buech ine. Ich bin empört – ich chans nöd anderst sege. Usbrechkönigin staht da. Das söll mer sich mal vorstelle.
Aber da stönd au no ganz vill gueti Sache. Nemlich dass d’Ida uh guet uf ihri Fründin d’Emma ufpasst. Und dass sie für sie fast alles macht – zumindest bis zu dem Moment wo sie nüme will.
Flowerpot
Flowerpot? Aso nei, Momenteli Moment. Das Pony chan doch nöd Bluemetopf heisse. Das isch doch kein Name füres Pony. Da stimmt doch öpis nöd. De Samichlaus isch da nöd iverstande. Ich glaube, es wäri gschiider, wenn mer Dich eifach nur wür Flower nenne. Das isch erstens herziger und passt zweitens vill besser zu some schnuslige Pony wie Dier. Was meined Ier Chinde?
Bisch Du eigetlich verwandt mit dene beide andere da? Gsehsch mer schurig ähnlich us. Du bisch meinti nonig so lang da ide Herde, gell? Mini Vögeli hend mier verzellt, dass es am Afang bitzeli schwierig isch, wemer sich so muen zrechtfinde inere noie Gruppe. Aber ich bin ganz sicher, dass das super chunt. Da, nimm au Du es grosses Rüebli.
Chantal
Die zweiti noii im Bund, staht da i mim dicke Buech. Es dunkt mich aber, dass Du dich eigetlich scho ganz guet iigläbt hesch, oder? Weisch, das mer am Anfang amel es bitz eis uf de Deckel bechunt, ghört au birebitzeli dezue. Das isch zwar nöd immer schön, aber so lauft das halt i sonere Herde.
De Samichlaus het zudem vernoo, dass Du und Dini Fründin zwei ganz spezielli Ponys sind. Will mit oi segi au e Kutsche im Cholbehof iizoge? Wow. Das findich denn toll. Chönt ich oi denn allefalls mal uslehne? Weisch, wenn mer min Sack d’schwär wird, denn wärs würkli schampar praktisch, hetich öpert wo für mich mini Sache zieht – und mich gar am End denn au no. Es Rüebli het ich da zum Dich überzüge
